Current Affairs Telugu Daily

జలాంతర్గాముల నిర్మాణ తొలి ప్రాజెక్టు కు కేంద్ర ప్రభుత్వం పచ్చజెండా
భారత నౌకా దళం కోసం రూ.60 వేల కోట్ల జలాంతర్గాముల నిర్మాణ ప్రాజెక్టుకు కేంద్ర ప్రభుత్వం పచ్చజెండా వూపింది. హిందూ మహాసముద్రంలో చైనా బలగాలను మోహరిస్తున్న నేపథ్యంలో ఈ ప్రాజెక్టుకు ప్రాధాన్యం ఏర్పడింది. రక్షణ ఉత్పత్తి రంగంలో ప్రయివేటు సంస్థలకు భాగస్వామ్యం కల్పిస్తూ గత నెలలో ఆమోదించిన ‘వ్యూహాత్మక భాగస్వామ్యం’ విధానం కింద చేపట్టనున్న తొలి ప్రాజెక్టు ఇదే కానుండడం విశేషం. దీనిపై రక్షణ శాఖ కొన్ని రోజుల్లో ఆసక్తి వ్యక్తీకరణ (ఎక్స్‌ప్రెషన్‌ ఆఫ్‌ ఇంట్రెస్ట్‌-ఈఓఐ) ప్రకటనను ఇవ్వనుంది.

పి-75(1) కార్యక్రమం కింద ఈ ప్రాజెక్టును చేపట్టడానికి ప్రయివేటు సంస్థలైన లార్సన్‌ అండ్‌ టుబ్రో, రిలయన్స్‌లతో పాటు ప్రభుత్వ రంగ సంస్థ అయిన మజగాన్‌ డాక్‌ లిమిటెడ్‌లు ఆసక్తి చూపుతున్నట్టు సమాచారం. విదేశీ తయారీదార్లను కూడా ఆహ్వానించాలని కేంద్రం భావిస్తోంది. నౌకాదళం కోసం పి-75 కింద ఇటీవల ఆరు స్కార్పెనే తరగతి జలంతర్గాములను నిర్మించారు. ఫ్రాన్స్‌కు చెందిన డీసీఎన్‌ఎస్‌ కంపెనీ సహకారంతో ముంబయిలోని మజగాన్‌ డాక్‌లో తయారు చేశారు. దానికి కొనసాగింపుగా పి-75(1)ను చేపట్టనున్నారు. ఇందులో ప్రయివేటు సంస్థలకు అవకాశం కలిగించనుండడం విశేషం. అవి 49 శాతం విదేశీ ప్రత్యక్ష పెట్టుబడులను స్వీకరించే అవకాశం కూడా ఉంది. పరికరాల అసలు తయారీదార్ల నుంచి సాంకేతిక సహకారం కూడా పొందవచ్చు. అయితే సంస్థ నిర్వహణ మాత్రం భారతీయ కంపెనీల చేతిలో ఉంటుంది.


views: 947

June Month Telugu Current Affairs e-Magazine
Download


Current affairs for TSPSC, APPSC (group-1, group-2, ....etc), UPSC, BSRB, RRB and all other competitive exams