Current Affairs Telugu Daily

2018లో భారత వృద్ధి 7.2% : ఐక్యరాజ్యసమితి 
కార్పొరేట్‌ సంస్థలు, బ్యాంకు బ్యాలెన్స్‌ షీట్లలో బలహీనత, వస్తు సేవల పన్ను (జీఎస్‌టీ) అమలు ప్రభావంతో 2017లో భారత వృద్ధి నెమ్మదించిందని ఐక్యరాజ్య సమితి వెల్లడించింది. ఆ ప్రభావాల నుంచి కోలుకుని, ఈ ఏడాది నుంచి వృద్ధిరేటు క్రమక్రమంగా పుంజుకుంటుందని పేర్కొంది. ‘2017లో భారత వృద్ధి 6.6 శాతంగా నమోదైంది. 2016లో నమోదైన 7.1 శాతంతో పోలిస్తే ఇది తక్కువ. ఆర్థిక వ్యవస్థ పుంజుకుంటున్నందున, 2018లో 7.2%, 2019లో 7.4% చొప్పున వృద్ధి నమోదు కావచ్చని ఐక్యరాజ్యసమితి అంచనా వేసింది.
  • ‘ప్రైవేట్‌ పెట్టుబడులు పుంజుకుంటున్నాయి. కార్పొరేట్‌ రంగం కొత్త పన్నుల విధానానికి అలవాటు పడుతోంది. మౌలిక పెట్టుబడులు పెరుగుతున్నాయి. ప్రభుత్వ మద్దతుతో కార్పొరేట్‌, బ్యాంకు బ్యాలెన్స్‌ షీట్లు పటిష్ఠం అవుతున్నాయి. వీటన్నింటి దృష్ట్యా భారత వృద్ధి క్రమక్రమంగా పుంజుకుంటుందని భావిస్తున్నామ’ని నివేదికలో పేర్కొంది.
  • దివాలా స్మృతి, ప్రభుత్వ రంగ బ్యాంకుల మూలధన పునర్‌వ్యవస్థీకరణ చర్యలు భారత్‌లో ప్రైవేట్‌ పెట్టుబడులు క్రమక్రమంగా పెరిగేందుకు దోహదం చేస్తాయని వివరించింది. పెద్ద నోట్ల రద్దు ప్రభావం పక్కకుపోవడంతో వినియోగం తిరిగి పుంజుకుందని పేర్కొంది.
  • ‘నిరర్థక ఆస్తులు రెట్టింపయ్యాయి. 2017 మధ్య కల్లా ఒత్తిడిలో ఉన్న బ్యాంకు రుణాలు రికార్డు స్థాయిలో రూ.9.5 లక్షల కోట్లకు చేరాయి. ఈ విలువ మరింత ఎక్కువగా ఉండచ్చొని కొన్ని నివేదికల ఆధారంగా తెలుస్తోంద’ని పేర్కొంది. అందువల్ల ప్రైవేటు పెట్టుబడులు మందగమనంతోనే ఉంటాయని, జీడీపీ వృద్ధి అధికంగా ఉండదని అంచనా వేసింది. ప్రభుత్వ ఉద్యోగులకు ఇంటి అద్దె భత్యాలు బాగా పెరగడం వల్ల  ద్రవ్య్బోణంలో వృద్ధికి కారణమైందని వెల్లడించింది.

views: 912



Current affairs for TSPSC, APPSC (group-1, group-2, ....etc), UPSC, BSRB, RRB and all other competitive exams