Current Affairs Telugu Daily

పరిమితికి మించిన నగదు లావాదేవీలకు ఒరిజినల్స్‌ తప్పనిసరి : కేంద్రం
నిర్ణీత పరిమితికి మించి నగదు లావాదేవీలు జరిపే వ్యక్తుల గుర్తింపు ధ్రువీకరణను ఒరిజినల్‌ పత్రాలతో సరిపోల్చుకోవాని కేంద్ర ప్రభుత్వం అన్ని బ్యాంకు, ఆర్థిక సంస్థలను ఆదేశించింది. అంటే వారు సమర్పించిన జిరాక్స్‌ పత్రాలు అసలు పత్రాల మాదిరిగానే ఉన్నాయా, ఏమైనా తేడాలు ఉన్నాయా అని పరిశీలించాల్సి ఉంటుంది. నకిలీ/దొంగ పత్రాలు, నకిలీ నోట్ల బెడద నివారించడానికే ఈ చర్య తీసుకొంది. నగదు అక్రమ రవాణా నిరోధక (దస్త్రా నిర్వహణ) సవరణ నిబంధన పేరుతో కేంద్ర ఆర్థిక మంత్రిత్వ శాఖ పరిధిలోని రెవెన్యూ విభాగం ఈ మేరకు రాజపత్రాన్ని వెలువరించింది.
- వినియోగదారుడు సమర్పించిన అధికారికంగా చెల్లుబాటయ్యే గుర్తింపు పత్రం అసలు ధ్రువపత్రంతో సరిపోయిందీ లేనిదీ పరిశీలించాలి. ఇలా చేసినట్టు ఆ పత్రంపై రాయాలి.
- బ్యాంకు ఖాతాను ప్రారంభించడం, రూ.50 వేలకు మించి ఆర్థిక లావాదేవీలు జరిపిన సమయంలో ఆధార్‌, ఇతర ధ్రువపత్రాలను సమర్పించాల్సి ఉంటుంది.
- రూ.10 లక్షలు, అంతకుమించి విదేశీ మారక ద్రవ్యంతో లావాదేవీలు జరిపే సమయంలోనూ ఈ నిబంధన వర్తిస్తుంది.
- ఇతర దేశాల నుంచి రూ.5 లక్షలు విలువ చేసే విదేశీ ద్రవ్యాన్ని పంపిస్తున్నప్పుడు, రూ.50 లక్షలకు మించి స్థిరాస్తి కొనుగోలు చేసినప్పుడు ఈ నిబంధనను పాటించాలి.
తాజా చిరునామా లేకుంటే సమర్పించాల్సిన ప్రత్యామ్నాయ పత్రాలు
- సమర్పించిన గుర్తింపు పత్రంలో తాజా చిరునామా లేకుంటే ప్రత్యామ్నాయంగా ఇతర పత్రాలు (వినియోగ బిల్లులు) సమర్పించవచ్చు.
- విద్యుత్తు, టెలిఫోన్‌, పోస్ట్‌ పెయిడ్‌ మొబైల్‌, పైపు ద్వారా వచ్చే వంటగ్యాస్‌, నీటి బిల్లులను తాజా చిరునామాకు ఆధారాలుగా సమర్పించవచ్చు.
- అయితే ఇవి రెండు నెలలకు మించి పాతవి కాకూడదు.
- ఇవే కాకుండా ఆస్తి పన్ను రసీదు, పురపాలక పన్ను రసీదు, విశ్రాంత ఉద్యోగులకు ప్రభుత్వ విభాగాలు ఇచ్చే పింఛను, కుటుంబ పింఛను చెల్లింపు ఉత్తర్వులు, ఉద్యోగులకు గృహ వసతి కల్పిస్తూ యజమాని ఇచ్చే ఉత్తర్వులను కూడా పరిగణనలోకి తీసుకుంటారు.
ఆర్థిక నిఘా విభాగానికి సమాచారం తెలియాల్సిందే 
- ఖాతాదారు సమాచారాన్ని భారత ఆర్థిక నిఘా విభాగం (ఫైనాన్సియల్‌ ఇంటెలిజెన్స్‌ యూనిట్‌ ఆఫ్‌ ఇండియా....ఎఫ్‌ఐయూ-ఐఎన్‌డీ)కి అందజేయాల్సి ఉంది.
- రూల్‌ నెంబరు 9 ప్రకారం.. ఖాతా ప్రారంభం సందర్భంగా పలు వివరాలను సేకరించి ఎఫ్‌ఐయూకు అందజేయాల్సి ఉంది. ఆ ఖాతాతో ఉన్న సంబంధం, ఖాతాదారులని గుర్తింపు, సమర్పించిన గుర్తింపు పత్రాలు సరయినవేనని నిర్ధరించడం, ఖాతా ప్రారంభించేందుకు గల ఉద్దేశం తదితర వివరాలను సమర్పించాల్సి ఉంది.
సమాచారం ఇవ్వాల్సిన సంస్థలు
సమాచారం అందించాల్సిన సంస్థలను ‘నివేదించే సంస్థల’ని నిబంధనల్లో పేర్కొన్నారు. ఈ జాబితాలో బ్యాంకు, ఆర్థిక సంస్థలు, స్టాక్‌ బ్రోకర్లు, చిట్‌ఫండ్‌ కంపెనీలు, సహకార బ్యాంకు, హౌసింగ్‌ ఫైనాన్స్‌ సంస్థలు, బ్యాకింగేతర ఆర్థిక సంస్థలు ఉన్నాయి.

views: 911

6 Months Telugu Current Affairs Practice Bits
Download


Current affairs for TSPSC, APPSC (group-1, group-2, ....etc), UPSC, BSRB, RRB and all other competitive exams